दुर्गाप्रसादलाई ५ लाख भारु क्षतिपूर्ति दिन कोलकाता उच्च अदालतको आदेश
अखबार हब
भारतको जेलमा अनाहक ४० वर्ष थुनिएर रिहा भएका इलामका दुर्गाप्रसाद तिम्सिना (दीपक जैसी) लाई भारु पाँच लाख रुपैयाँ क्षतिपूर्ति दिन कोलकाताको उच्च अदालतले आदेश दिएको छ । विनाकसुर ४० वर्ष थुनिएर गत चैतमा रिहा भएका तिम्सिनालाई कोलकाताको उच्च अदालतले ५ लाख भारु दिन पश्चिम बंगाल सरकारलाई आदेश दिएको हो ।
मुख्य न्यायाधीश प्रकाश श्रीवास्तव र न्यायाधीश राजर्षि भारद्वाजको संयुक्त इजलासले तिम्सिनाको खातामा तत्काल भारु पाँच लाख अर्थात् नेपाली ८ लाख रुपैयाँ दिन आदेश दिएको हो ।
उच्च अदालतले ७ डिसेम्बर (मंसिर २१ गते) भारतस्थित नेपाली महावाणिज्य दूतावासमार्फत दुर्गाप्रसादको बैंक खातामा पाँच लाख भारु पठाउन आदेश दिएको दुर्गाप्रसादको मुद्दामा बहस पैरवी गरेका कोलकाताका वकिल हिरक सिन्हाले बताए ।
इलामको माई नगरपालिका–१० बाट दुर्गाप्रसाद १९ वर्षको हुँदा तोरी बेच्न भन्दै मंगलबारे गएका थिए । त्यसपछि काम खोज्दै दार्जिलिङमा पुगेका उनी एक युवतीको हत्या आरोपमा पक्राउ परेका थिए ।
आरोप प्रमाणित नभएपछि ४ चैत २०७७ मा उनलाई कोलकाता उच्च अदालतले रिहा गर्न आदेश दिएको थियो ।
