टिपरको ठक्करबाट बाबु–छोराको घटनास्थलमै मृत्यु, अटो रिर्जभमा परिवारै जाँदै थिए मन्दिर दर्शन गर्न
अखबार हब
दाङ । प्युठानमा टिपरले अटोलाई ठक्कर दिँदा बाबु–छोराको घटनास्थलमै मृत्यु भएको छ भने थप तीन जना घाइते छन्।
जिल्लाको प्युठान नगरपालिका वडा नं. ३ घुर्चनेका ४२ वर्षीय अमृत लाल थापा र उनका ५ वर्षीय छोरा सुशान्त थापाको घटनास्थलमै मृत्यु भएको हो।
जिल्ला प्रहरी प्रमुख डिएसपी सत्यनारायण थापाका अनुसार दुर्घटनामा परी ३४ वर्षीय पुनम थापा, ११ वर्षीय दुर्गा थापा र १३ वर्षीय सुस्मा थापा घाइते छन्।
घाइते सबैको जिल्ला अस्पताल बिजुवारमा उपचार भइरहेको डिएसपी थापाले बताए।
घाइते र मृतक एकै घर परिवारका व्यक्ति हुन्।
प्रहरीका अनुसार उनीहरू अटो रिजर्भ गरी स्वर्गद्वारी मन्दिरको दर्शन गर्न भनेर जाँदै गरेका थिए।
दाङबाट इँट्टा बोकेर प्युठानतर्फ जाँदै गरेको ना ८ ख ३९०३ नम्बरको टिपरले सोमबार दिउँसो १ बजेतिर रा १ ह ७५०७ नम्बरको अटोलाई ठक्कर दिँदा उक्त घटना भएको प्रहरीले जनाएको छ।
टिपरले अटोलाई प्युठानको माण्डपी गाउँपालिका वडा नं. ५ को चकचके– चरनेटा सडकखण्डमा ठक्कर दिएको प्रहरीले जनाएको छ।
टिपर र चालक प्रहरी नियन्त्रणमा रहेको प्रहरीले जानकारी दिएको छ।
