कृषि मन्त्रीद्वारा धुलोदुध कारखानाको निरीक्षण, सञ्चालन मोडालिटी अन्तिम चरणमा
अखबार हब
हेटौंडा । बागमती प्रदेश सरकारका कृषि तथा पशुपन्छी विकास मन्त्री मधुसूदन पौडेलले धुलोदुध कारखानाको निरीक्षण गर्नु भएको छ ।
बिहीवार प्रदेश सरकारको करिब ४७ करोड रुपैयाँको लागतमा निर्माण भएको भए पनि सञ्चालन कार्यविधि तयार नहुँदा परीक्षण उत्पादनमै सीमित रहेको सो कारखानाको अवस्था बुझ्न मन्त्री पौडेल निरीक्षणमा पुग्नु भएको हो ।
दुई बर्ष अघिदेखीनै परीक्षण उत्पादन सुरु भएको यो कारखानाको पूर्ण सञ्चालनका लागि आवश्यक कार्यविधि तथा मोडालिटी तयार गर्ने प्रक्रिया लामो समयदेखि जारी छ ।
निरीक्षणपछि बोल्दै मन्त्री पौडेलले करिब ४७ करोडको लागतमा निर्माण भएको यो धुलोदुध कारखाना अहिले परीक्षण उत्पादनमै सीमित रहेको अवस्थामा रहनु ठूलो लगानी जोखिममा पार्नु भएकोले यसको सञ्चालन मोडालिटी र कार्यविधि तयार पार्ने कामलाई आफूहरूले अन्तिम चरणमा पुर्याएको बताउनुभयो।
उहाँले आफ्नो निरीक्षणको उद्देश्य यसको भौतिक र प्राविधिक अवस्था बुझेर, छिटोभन्दा छिटो कार्यविधि तयार गरी पूर्ण क्षमतामा सञ्चालन गर्ने सुनिश्चित गर्नु रहेको स्पष्ट पार्नुभयो ।
मन्त्री पौडेलका अनुसार यो कारखाना सञ्चालनमा आउँदा प्रदेशभित्र दूधको अधिक उत्पादन भएको बेला किसानले दूध सडकमा पोख्नुपर्ने वा सस्तोमा बेच्नुपर्ने बाध्यताको अन्त्य हुनेछ र यसले दुग्ध किसानलाई उचित मूल्यको सुनिश्चितता प्रदान गरी प्रदेशको कृषि अर्थतन्त्रमा ठूलो टेवा पुर्याउने छ।
उहाँले कारखानामा जडान गरिएका उपकरण, भण्डारण क्षमता र हाल भइरहेको परीक्षण उत्पादनको अवस्थाबारे जानकारी लिएपछि कारखानालाई पूर्ण व्यावसायिक रूपमा सञ्चालन गर्न आवश्यक कार्यविधि छिट्टै स्वीकृत गर्ने बताउनु भएको छ ।
कारखाना स्थापना भएपछि प्रदेश सरकार, कृषि तथा पशुपन्छी विकास मन्त्रालयले कारखानाबाट धुलो दुध परिक्षण उत्पादनका लागि दुग्ध विकास संस्थान (डिडिसी) लाई जिम्मा दिएको थियो ।
समाचार थप
