यातायात कार्यालय हेटौंडाका अधिकृत भेटुवाल र बिचौलिया पौडेल विरुद्ध भ्रष्टाचार मुद्दा दायर
अखबार हब
हेटौँडा । घुस रकमसहित रङ्गेहाल पक्राउ परेका यातायात व्यवस्था कार्यालय, हेटौँडाका अधिकृत (छैटौँ) अमृत भेटुवाल र लेखापढी व्यवसायी (बिचौलिया) खगेन्द्र पौडेलविरुद्ध विशेष अदालतमा भ्रष्टाचार मुद्दा दायर गरेको छ।
सवारी साधनको सरुवा सहमति बनाइदिने भन्दै सेवाग्राहीसँग ११ हजार ५ सय रुपैयाँ घुस लिएको आरोपमा उनीहरूविरुद्ध आज अख्तियार दुरुपयोग अनुसन्धान आयोगको कार्यालयले काठमाडौँस्थित विशेष अदालतमा आरोपपत्र दायर गरिएको हो।
यसअघि अख्तियारको हेटौँडा कार्यालयबाट खटिएको टोलीले बिचौलिया पौडेलले सेवाग्राहीबाट उक्त रकम लिइसकेको अवस्थामा दुवै जनालाई नियन्त्रणमा लिएको थियो।
अनुसन्धानका क्रममा अधिकृत भेटुवाल र बिचौलिया पौडेलको आपसी मिलेमतो र पूर्वयोजनामै घुस लेनदेन भएको पुष्टि भएको अख्तियारले जनाएको छ। आयोगले दुवै जनालाई भ्रष्टाचार निवारण ऐन, २०५९ बमोजिम ११ हजार ५ सय रुपैयाँ नै बिगो कायम गरी सोही बराबरको जरिवाना र कैद सजायको मागदाबी गरेको आयोगका प्रवक्ता सुरेश न्यौपानेले जानकारी दिए।
