अन्योलमा बागमतीको बजेट भाषण
अखबार हब
हेटौंडा । बागमती प्रदेशको मन्त्रिपरिषद् बैठक दुई घण्टालाई सरेको छ । आज आइतबार मात्रै दोस्रो पटक मन्त्रिपरिषद् बैठक सरेको हो ।
संघीय सरकारको अर्थ मन्त्रालयअन्तर्गतको बजेट प्रणालीबाट बागमतीको बजेटको कार्यसूचिमा हेरफेर गर्नुपर्ने भएकाले साढे ५ बजेलाई बोलाइएको बैठक दुई घण्टाका लागि सारिएको सरकारका प्रवक्ता आन्तरिक मामिला तथा कानुनमन्त्री सुरजचन्द्र लामिछानेले जानकारी दिए ।
आज मन्त्रिपरिषद् बैठक दिउसो साढे २ बजेलाई बोलाइएको थियो । बजेटमा सरकारभित्रै विवाद भएपछि पहिलो पटक साढे ५ बजेलाई बैठक धकेलिएको थियो।
मन्त्रीहरू बैठकका लागि मुख्यमन्त्री तथा मन्त्रिपरिषद्को कार्यालयमा पुगेपछि दोस्रो पटकका लागि सारिएको थियो ।
आगामी आर्थिक वर्ष २०८२/८३ को बजेट प्रस्तुतका लागि आज दिउँसो ३ बागमती प्रदेश सभा बैठक राखिएको थियो।
प्रदेश सभा बैठक पनि साढे ६ बजेलाई सारिएको छ । तर, मन्त्रिपरिषद् बैठक नै ७ बजे भन्दा ढिलो हुने भएपछि प्रदेश सभा बैठक पनि धकेलिने निश्चित छ । जसकारण आज प्रस्तुत हुने भनिएको बजेटमा अन्योलता देखिएको छ ।
