१ सय ७ किलो लागुऔषध गाँजासहित मकवानपुरमा दुई युवक पक्राउ
अखबार हब२०८२ फाल्गुन २६, मंगलवार २०:५१
हेटौंडा। मकवानपुर प्रहरीले सोमबार राति १ सय ७ किलो गाँजासहित दुई युवकलाई पक्राउ गरेको छ ।
गाँजासहित अटो चालक मकवानपुर राक्सिराङ गाउँपालिका-६ धुसराङका ३३ वर्षीय सन्तसिंह लामा राक्सिराङ गाउँपालिका-२ सुनारी सौराहका ३० वर्षीय सन्तवीर मोक्तानलाई मकवानपुर मनहरी पक्राउ गरेको हो ।
मनहरी गाउँपालिका-८ सिमपानी देवकोट भित्री सडकबाट पूर्व-पश्चिम राजमार्ग मनहरीतर्फ आइरहेको बा.प्र.०३-००१ ह २०७६ नम्बरको अटोलाई प्रहरीले रोकेर जाँच गर्ने क्रममा उक्त गाँजा फेला परेको हो । अटो भित्र १० वटा पोकामा लुकाएर ल्याएको गाँजा फेला परेपछि अटो, गाँजा र अटो चालक लामा र अटोमा सवार मोक्तानलाई नियन्त्रणमा लिएको जिल्ला प्रहरी कार्यालय मकवानपुरका प्रहरी नायब उपरीक्षक एवं प्रवक्ता पुष्कर बोगटीले बताए ।
अदालतबाट म्याद थप गरेर थप अनुसन्धान गरिरहेको प्रहरीले जनाएको छ ।
