नाबालिका बलात्कारको आरोपमा शिवम् सिमेन्टको चुनढुङ्गा ओसार्ने दुई टिप्पर चालक पक्राउ

मकवानपुर । मकवानपुरको मकवानपुरगढी गाउँपालिका–७ का दुई नाबालिकामाथि बलात्कार गरेको आरोपमा दुई जना युवक पक्राउ परेका छन् ।

१४ र १६ वर्षका दुई नाबालिकामाथि शिवम् सिमेन्टमा चुनढुङ्गा ओसारपसार गर्ने दुई जना टिप्पर चालकमाथि बलात्कारको आरोप लागेको हो । मकवानपुर प्रहरीले उनीहरूलाई २८ चैत बुधबार पक्राउ गरेको हो ।

डीएसपी लक्ष्मी भण्डारीले आरोपीहरूलाई हिरासतमा राखेर अनुसन्धान गरिरहेको बताए । दुई जना छात्राले बुधबार नै जिल्ला प्रहरी कार्यालयमा परिवारसहित पुगेर घटनाबारे जानकारी गराएका थिए । जाहेरीमा २५ चैतमा मकवानपुरगढीको ७ नम्बर वडामा बलात्कारको घटना भएको जनाइएको छ । घटनास्थल लगायतका विषयमा अनुसन्धान गरिरहेको  प्रहरीले जनाएको छ ।