मकवानपुरको कुन्छालमा देवरले गरे भाउजुको हत्या
अखबार हब
मकवानपुर । मकवानपुरको थाहा नगरपालिका वडा नं. १ कुन्छालमा एक महिलाको हत्या भएको छ ।
बिहीबार दिउँसो २:२० बजेको समयमा धारिलो हतियारको प्रहारबाट देवरले भाउजुको हत्या गरेको हो । हत्या गर्ने व्यक्ति फरार भए पनि केही घण्टामै प्रहरीको नियन्त्रणमा लिइएको छ।
स्थानीय ५० वर्षीया तुलमाया गोपालीको आफ्नै छिमेकी तथा ३५ बर्षिय देवर बिमलमान गोपालीले खुकुरी प्रहार गरी हत्या गरेका हुन्। मकवानपुर प्रहरीका अनुसार आरोपितले तुलमायाको टाउको र जिउ छुट्टिने गरी धारिलो हतियार प्रयोग गरेर हत्या गरेका थिए। घटनास्थलमै मृत्यु भएपछि स्थानीयले प्रहरीलाई खबर गरेका थिए।
घटनाको जानकारी पाउनेबित्तिकै इलाका प्रहरी कार्यालय पालुङका प्रहरी निरीक्षक सबिनबाबु अर्याल नेतृत्वको टोली र अस्थायी प्रहरी पोस्ट बज्रबाराहीका प्रहरी निरीक्षक सन्तु कुमार लामाको टोली घटनास्थल पुगेको थियो।
हत्या गरेपछि फरार रहेका बिमलमान गोपालीलाई प्रहरीले करिब ३ः३५ बजे थाहा नगरपालिका–३ स्थित थानाबजारबाट खुकुरीसहित नियन्त्रणमा लिएको जनाएको छ। उनलाई नियन्त्रणमा लिएर थप अनुसन्धानका लागि इलाका प्रहरी कार्यालय पालुङमा राखिएको छ।
घटनास्थलको प्रारम्भिक अनुसन्धानपछि मृतक तुलमायाको शव पोष्टमार्टमका लागि काठमाडौंस्थित शिक्षण अस्पताल पठाइएको छ। मृतकको माइती पनि सोही ठाउँ कुन्छालमै रहेको प्रहरीले जनाएको छ। प्रारम्भिक अनुसन्धानका आधारमा घटनाको कारण पारिवारिक विवाद हुनसक्ने आशंका गरिएको छ।
यस घटनाले स्थानीयवासीलाई स्तब्ध तुल्याएको छ। प्रहरी स्रोतका अनुसार घटनाको सम्बन्धमा थप अनुसन्धान भइरहेको छ।
